Table of Contents
ഇന്ത്യയുടെ പ്രഥമ പ്രധാനമന്ത്രിയായിരുന്ന പണ്ഡിറ്റ് ജവഹർലാൽ നെഹ്റുവിന്റെ ജന്മദിനമായ നവംബർ 14 നമ്മൾ ദേശീയ ശിശുദിനമായി അചരിക്കുകയാണ്. കുട്ടികളെ അകമഴിഞ്ഞ് സ്നേഹിച്ചിരുന്ന പ്രിയപ്പെട്ട ചാച്ചാജിക്ക് പ്രണാമം അർപ്പിച്ച് രാജ്യത്തെമ്പാടുമുള്ള സ്കൂളുകളിലും മറ്റ് വിദ്യാഭ്യാസ സ്ഥാപനങ്ങളിലും
വിവിധ പരിപാടികൾ അരങ്ങേറും. ശിശുദിനാശംസകൾ നേർന്നുകൊണ്ട് അവതരിപ്പിക്കാവുന്ന ശിശുദിന പ്രസംഗങ്ങൾ താഴെ ഉൾപ്പെടുത്തുന്നു.
ശിശുദിന പ്രസംഗം 2024
(Children’s day speech in Malayalam 2024)
1: Who was the first woman President of India?
വേദിയിലും സദസ്സിലുമുള്ള ബഹുമാന്യരേ, പ്രിയപ്പെട്ട കുഞ്ഞുങ്ങളേ…
ഇന്ന് നവംബർ 14. നെഞ്ചിൽ ചെമ്പനീർ പൂവും ചുണ്ടിൽ നിറപുഞ്ചിരിയും എന്നും സൂക്ഷിച്ചിരുന്ന ഇന്ത്യയുടെ പ്രഥമ പ്രധാനമന്ത്രി പണ്ഡിറ്റ് ജവഹർലാൽ നെഹ്റുവിന്റെ ജന്മദിനം. കുട്ടികളെ തന്റെ ജീവനു തുല്യം സ്നേഹിച്ചിരുന്ന പ്രിയപ്പെട്ട ചാച്ചാജിയുടെ പിറന്നാൾ ഓരോ വർഷവും ശിശുദിനമായി നമ്മൾ ആചരിച്ചുവരികയാണ്. നാളെയുടെ വെളിച്ചവും പ്രതീക്ഷകളുമായ നമ്മുടെ കുഞ്ഞുമക്കൾക്ക് ആദ്യമേ ശിശുദിനാശംസകൾ നേരുന്നു.
പൂന്തോട്ടത്തിൽ വിരിയാറായി നിൽക്കുന്ന പൂമൊട്ടുകളായിട്ടാണ് നെഹ്റു കുട്ടികളെ കണ്ടിരുന്നത്. കൃത്യമായ പരിചരണവും വളരാനുള്ള സാഹചര്യങ്ങളും ഒരുക്കിക്കൊടുത്താൽ അവർ നിറയെ വർണ്ണങ്ങളുള്ള പൂക്കളായി മാറും. രാജ്യത്തിന്റെ യഥാർത്ഥ സമ്പത്ത് അവരാണെന്നും അദ്ദേഹം വിശ്വസിച്ചു. കുട്ടികളുടെ വിദ്യാഭ്യാസത്തെയും ഉന്നമനത്തെയും കുറിച്ച് നിരന്തരം വാചാലനായിരുന്ന അദ്ദേഹം, കുട്ടികൾക്കിടയിൽ ആയിരിക്കാനും അവരോടൊപ്പം സമയം ചിലവഴിക്കാനും സദാ ശ്രദ്ധിച്ചിരുന്നു.
1889 നവംബർ 14ന് മോത്തിലാൽ നെഹ്റുവിന്റെയും സ്വരൂപ് റാണി നെഹ്റുവിന്റെയും മകനായി ഉത്തർപ്രദേശിലെ അലഹബാദിലായിരുന്നു ജവഹർലാൽ നെഹ്റുവിന്റെ ജനനം. പ്രാഥമിക വിദ്യാഭ്യാസത്തിനു ശേഷം തുടർ പഠനം ഇംഗ്ലണ്ടിൽ പൂർത്തിയാക്കിയ നെഹ്റു, 1912ൽ തിരിച്ച് ഇന്ത്യയിലെത്തി തന്റെ രാഷ്ട്രീയ ജീവിതം ആരംഭിച്ചു. ഇന്ത്യൻ സ്വാതന്ത്ര്യ സമരത്തിന്റെ മുന്നണിപ്പോരാളിയായി മാറിയ അദ്ദേഹം, മഹാത്മാ ഗാന്ധിയോടൊപ്പം ചേർന്ന് ബ്രിട്ടീഷ് വിരുദ്ധ പോരാട്ടങ്ങൾക്ക് നേതൃത്വം നൽകി.
ശാസ്ത്ര സാങ്കേതിക മേഖലകളിൽ ഇന്ത്യയെ വളർത്തിയെടുക്കുക എന്ന വലിയ ദൗത്യമായിരുന്നു പ്രധാനമന്ത്രി പദത്തിൽ എത്തിയ നെഹ്റു നിറവേറ്റിയത്. വിദ്യാഭ്യാസത്തിന്റെയും ശാസ്ത്രീയ ചിന്താഗതിയുടെയും പ്രാധാന്യം മനസ്സിലാക്കിയ അദ്ദേഹം, അനേകം പ്രാഥമിക, ഉന്നത വിദ്യാഭ്യാസ സ്ഥാപനങ്ങൾ തന്റെ കാലയളവിൽ പണികഴിപ്പിച്ചു. ആധുനിക ഇന്ത്യയുടെ ശില്പി എന്നാണ് നെഹ്റു അറിയപ്പെടുന്നത്. എയിംസ്, ഐ.ഐ.ടി, ഐ.ഐ.എം, എൻ.ഐ.ടി തുടങ്ങിയവ നെഹ്റുവിന്റെ കാലത്തെ വികസനങ്ങളിൽ ചിലതാണ്.
1964 വരെ ഐക്യരാഷ്ട്ര സഭ നിശ്ചയിച്ചിരുന്ന പ്രകാരം നവംബർ 20-ാണ് ശിശുദിനമായി ആചരിച്ചിരുന്നത്. എന്നാൽ കുട്ടികളുടെ ക്ഷേമത്തിനും വിദ്യാഭ്യാസത്തിനും ഉന്നമനത്തിനുമായി നെഹ്റു നൽകിയ സംഭാനവനകൾ പരിഗണിച്ച് അദ്ദേഹത്തിന്റെ ജന്മദിനമായ നവംബർ 14 ദേശീയ ശിശുദിനമായി ആചരിക്കാൻ ഭരണകൂടം തീരുമാനിക്കുകയായിരുന്നു.
വിദ്യാഭ്യാസം എന്നതുകൊണ്ട് ചാച്ചാജി ഉദ്ദേശിച്ചിരുന്നത് കേവലം എഴുത്തും വായനയും പാഠപുസ്തക പഠനവും മാത്രമായിരുന്നില്ല, മറിച്ച് ചിന്തിക്കാനും ചോദ്യം ചോദിക്കാനും സ്വപ്നം കാണാനുമുള്ള കഴിവുകൂടിയാണ്. ആർക്കും അപഹരിക്കാനാകാത്ത സമ്പത്ത് നമ്മൾ സ്വന്തമാക്കുന്ന അറിവുകൾ മാത്രമാണ്. ശരിയായ വിദ്യാഭ്യാസത്തിലൂടെ വ്യക്തികളെയും അതുവഴി രാജ്യത്തെത്തന്നെയും നവീകരിക്കാൻ കഴിയുമെന്ന് നെഹ്റു വിശ്വസിച്ചു.
കുട്ടികളെ നേരായ രീതിയിൽ വളർത്തിയെടുക്കേണ്ടതിന്റെ ആവശ്യഗതയെക്കുറിച്ചും വളർച്ചയുടെ കാലഘട്ടത്തിൽ മാതാപിതാക്കളും അദ്ധ്യാപകരും അടങ്ങുന്ന ചുറ്റുപാടുമുള്ളവർ ശ്രദ്ധിക്കേണ്ട കാര്യങ്ങളെക്കുറിച്ചും ചാച്ചാജി സംസാരിക്കുമായിരുന്നു. വളർന്നു വലുതായി വ്യത്യസ്ഥ മേഖലകളിൽ രാജ്യത്തെ മുന്നോട്ടു നയിക്കാൻ തയ്യാറെടുക്കുമ്പോഴും അനുകമ്പയുടെയും ദയയുടെയും ധൈര്യത്തിന്റെയും മൂല്യങ്ങൾ ഉയർത്തിപ്പിടിക്കാനും സദാ സത്യസന്ധരായിരിക്കാനും അദ്ദേഹം കുട്ടികളെ ഉപദേശിച്ചു.
മറ്റൊരു ശിശുദിനം കൂടി കടന്നുവന്നിരിക്കുന്ന ഈ വേളയിൽ നമ്മുടെ പ്രിയപ്പെട്ട ചാച്ചാജി പകർന്നു തന്ന പാഠങ്ങളും അദ്ദേഹത്തിന്റെ നല്ല വാക്കുകളും നമുക്ക് സ്മരിക്കാം. ഓരോ കുട്ടിക്കും സുരക്ഷയും വിദ്യാഭ്യാസവും വളരാനുള്ള നല്ല ജീവിത ചുറ്റുപാടുകളും ഉറപ്പുവുരുത്തേണ്ടതിന്റെ ഓർമ്മപ്പെടുത്തൽ കൂടിയാകണം ഈ ശിശുദിന ആഘോഷം.
സാമൂഹികവും സാമ്പത്തികവുമായ സംരക്ഷണവും പ്രാഥമിക വിദ്യാഭ്യാസം, ശുദ്ധജലം, ഭക്ഷണം തുടങ്ങിയ അടിസ്ഥാന അവകാശങ്ങളും നിഷേധിക്കപ്പെടുന്ന അനേകം കുട്ടികൾ ഇന്നും നമ്മുടെ രാജ്യത്തുണ്ട് എന്നത് സങ്കടകരമായ വസ്തുതയാണ്. ഈ സാഹചര്യത്തിന് മാറ്റമുണ്ടാക്കാൻ രാജ്യം ഒറ്റക്കെട്ടായി പ്രവർത്തിക്കേണ്ടതുണ്ട്. ഇത്തരം കുട്ടികളുടെ ജീവിതം മെച്ചപ്പെടുത്താൻ നമ്മളാൽ കഴിയുന്ന കാര്യങ്ങൾ ചെയ്യുമെന്ന് ഈ ശിശുദിനത്തിൽ നമുക്ക് പ്രതിജ്ഞ ചെയ്യാം.
ചാച്ചാജിയുടെ സ്വപ്നം പോലെ ഭാവി ഇന്ത്യയെ രൂപപ്പെടുത്തുന്ന നല്ല പൗരന്മാരായി വളരാനും രാജ്യത്തെ പുതിയ ഉയരങ്ങളിൽ എത്തിക്കാനും നമ്മുടെ കുഞ്ഞുമക്കൾക്കാകട്ടെ എന്ന് ആശംസിക്കുന്നു. അതിരില്ലാതെ സ്വപ്നങ്ങൾ കാണാനും ആ സ്വപ്നങ്ങൾക്കായി പ്രയത്നിക്കാനും നിങ്ങൾക്കാകട്ടെ. നമ്മുടെ കുട്ടികളെ ഭാവിയുടെ നല്ല വാഗ്ദാനങ്ങളായി വളർത്തിയെടുക്കേണ്ടത് മാതാപിതാക്കളും അദ്ധ്യാപകരുമടങ്ങുന്ന നമ്മൾ പൊതു സമൂഹത്തിന്റെ ഉത്തരവാദിത്തമാണെന്നുകൂടി ഓർമ്മിപ്പിച്ചുകൊണ്ട്, എല്ലാവർക്കും ഒരിക്കൽകൂടി ശിശുദിനാശംസകൾ നേരുന്നു.
നന്ദി നമസ്കാരം
ജയ് ഹിന്ദ്
Free UPSKILLING Courses!
Take your first step toward mastering in-demand skills, acing interviews, and securing top-tier jobs with Entri's free upskilling courses.
Start Learning!
കുട്ടികൾക്കായുള്ള ശിശുദിന പ്രസംഗം 2024 (Children’s day speech in Malayalam for kids 2024)
ബഹുമാനപ്പെട്ട പ്രിൻസിപ്പാൾ, അധ്യാപകരെ, എന്റെ പ്രിയപ്പെട്ട കൂട്ടുകാരെ…
ഇന്ന് നവംബർ 14. ഏറെ സന്തോഷമുള്ള ഈ ദിവസം ആഘോഷിക്കാൻ ഒത്തുകൂടിയിരിക്കുന്ന എല്ലാവർക്കും ശിശുദിനത്തിന്റെ ആശംസകൾ അദ്യമേ നേരുകയാണ്. ഇന്ത്യയുടെ ആദ്യത്തെ പ്രധാനമന്ത്രിയായിരുന്ന പണ്ഡിറ്റ് ജവഹർലാൽ നെഹ്റുവിന്റെ ജന്മദിനമാണ് നമ്മൾ ശിശുദിനമായി ആചരിക്കുന്നത്. കുട്ടികളെ ഒരുപാട് ഇഷ്ടമായിരുന്ന നെഹ്റുവിനെ സ്നേഹത്തോടെ കുട്ടികൾ ചാച്ചാജിയെന്നാണ് വിളിച്ചിരുന്നത്. നെഞ്ചിൽ ഒരു റോസാപ്പൂവും തലയിൽ വെള്ള തൊപ്പിയുമായി എപ്പോഴും ചിരിച്ചുകൊണ്ട് മാത്രം സംസാരിച്ചിരുന്ന ചാച്ചാജിയുടെ മുഖം നമുക്കെല്ലാം സുപരിചിതമാണ്.
കുട്ടികളെ ചാച്ചാജി കണ്ടിരുന്നത് പൂന്തോട്ടത്തിലെ പൂമൊട്ടുകൾ പോലെയാണ്. ഭംഗിയുള്ള പൂക്കളായി വിരിഞ്ഞ് വർണ്ണവും ഗന്ധവും പരത്തേണ്ട പൂമൊട്ടുകൾ. ഭാവി ഇന്ത്യയുടെ വാഗ്ദാനങ്ങളായി ചാച്ചാജി കരുതിയിരുന്ന കുട്ടികൾക്കിടയിൽ ആയിരിക്കാൻ അദ്ദേഹം എപ്പോഴും ആഗ്രഹിച്ചു. കുട്ടികളുടെ അവകാശങ്ങളെക്കുറിച്ചും വിദ്യാഭ്യാസത്തെക്കുറിച്ചും കുട്ടികൾക്ക് നൽകേണ്ട പരിചരണത്തെക്കുറിച്ചും നെഹ്റു എന്നും സംസാരിച്ചിരുന്നു. കുട്ടികൾക്ക് വിദ്യാഭ്യാസം ഉറപ്പുവരുത്തുന്നതിനായി അനേകം വിദ്യാലയങ്ങൾ നിർമ്മിക്കാനും ചാച്ചാജിക്കായി.
കുട്ടികളോടുള്ള ചാച്ചാജിയുടെ അകമഴിഞ്ഞ സ്നേഹത്തിന്റെ ഓർമ്മക്കായാണ് അദ്ദേഹത്തിന്റെ ജന്മദിനം ശിശുദിനമായി ആചരിക്കുന്നത്. കുട്ടികളെപ്പറ്റി അദ്ദേഹം പറഞ്ഞ വാക്കുകൾ എല്ലാ കാലത്തും പ്രസക്തമാണ്. ‘ഇന്നത്തെ കുട്ടികളാണ് നാളത്തെ ഇന്ത്യയെ രൂപപ്പെടുത്തുന്നത്. നമ്മൾ അവരെ വളർത്തുന്ന രീതിയാണ് രാജ്യത്തിന്റെ ഭാവിയെ നിർണ്ണയിക്കുക’.
രാജ്യത്തെ മുഴുവൻ കുട്ടികൾക്കും സുരക്ഷയും വിദ്യാഭ്യാസവും നല്ല ചുറ്റുപാടുകളും ഉറപ്പുവരുത്തേണ്ടതിന്റെ ഓർമ്മപ്പെടുത്തൽ കൂടിയാണ് ഓരോ ശിശുദിനവും. ചാച്ചാജിയുടെ സ്വപ്നം പോലെ ഭാവി ഇന്ത്യയെ രൂപപ്പെടുത്തുന്ന നല്ല പൗരന്മാരായി നമുക്ക് വളർന്നു വരാം. എല്ലാവർക്കും ഒരിക്കൽകൂടി ശിശുദിനാശംസകൾ നേർന്നുകൊണ്ട് നിർത്തുന്നു.
നന്ദി നമസ്കാരം
ജയ് ഹിന്ദ്
| Other Important Links | |
| Monthly Current Affairs | Kerala PSC Latest Notifications |
| Kerala PSC Upcoming Exams | Kerala PSC Previous Questions |
| Entri Rank File | Daily Current Affairs in Malayalam |
